Tuesday, April 26, 2011

மீண்டும் வருமா?

                                                     
                                                       நாட்டு மரக் கறியும் 
                                                       நல்ல கைக் குத்தரிசியும்
                                                       மான் இறைச்சியும்
                                                       மணலை மீனும் 
                                                       நாட்டுக் கோழியும் 
                                                       நல்ல மட்ட றாலும்
                                                       இட்டமுடன் தின்ற காலம் 
                                                       இனி மீண்டும் வருமா 
  


                                                       காடு வெட்டி
                                                       கடும்பாடு பட்டு
                                                       மேட்டு நிலத்தில் -
                                                       சேனைப் பயிர் செய்து.....   
                                                   
                                                       சோளம்-இறுங்கு-குரக்கன்
                                                       சோக்கான தினை
                                                       தானியமாய் எங்களுக்கு
                                                       தந்த காலம்......
                                                       மீண்டும் வருமோ!


                                                      காடு சென்று
                                                      வேட்டையாடி
                                                     'காஞ்செறச்சி'
                                                      கொண்டு வரவும்......


                                                      பாலைப் பழம்
                                                      வீரப் பழம்
                                                      தாமரைக் காய் -
                                                      பறித்து வரவும்......
                                 
                                                      சுதந்திரமாய் இருந்த காலம்
                                                      மீண்டும் பிறந்து வருமோ!                                  


                                                       அறுகம்குடா வாவியிலே -  அன்று
                                                       துள்ளி விளையாடிய
                                                      'கயல் மீன்கள்' எங்கே?
                                                     
                                               
                                                      நமதூர்ப்பெண்களின்
                                                                      'கண்களாய்' மாறிவிட்டனவோ!

                                                                       கொடுவாக்குட்டி-பாரைக் குட்டி
                                                                      'மண்வெட்டிச் சுறா'
                                                                       பாலைமீன்-காலைமீன்
                                                                       மன்னா-மணலை உண்டகாலம்
                                                                       மாறிவிட்டதே.....
                                                                       மறுபடியும் வருமோ
                                                                       அந்தக் காலம்!


                                                                      'மஃரிபு' நேரம் பார்த்து -
                                                                       மறைவாய் நின்று......
                                                                       தந்திக் கம்பிக்கு -
                                                                       பதுங்கிப் பதுங்கி......


                                                                     'சீமெந்துத் தாள்பேக்'கில்
                                                                     'ஜப்பான் மீன்' வாங்கிச் -
                                                                      சென்ற காலம்
                                                                      மறைந்து போய்.......


                                                                    'ஸொப்பிங் பேக்'கில்
                                                                     ஜப்பான் மீன்
                                                                    'கோல்டன்' ஆகி......
                                                                     சொகுசாய் செல்கிறதே!
    
                                                                     மணலையும் ஜப்பானும்......
                                                                     சமமாய் அமர்ந்து -
                                                                     சந்தையில் இன்று......
                                                                     விலையில் ஒன்று!
         
                                                                    ஆற்றங் கரைதனில்
                                                                    அறுத்து வந்த
                                                                   'பன்-புல்'லை அழகாய் வாட்டி
                                                                    பலவர்ணச் சாயமும் ஏற்றி.....
                                                                    படுக்கப் பாய் இழைத்து


     
                                                                     பனை யோலையால்......
                                                                     பெட்டி தட்டு விசிறி செய்து
                                                                     சிக்கனமாய் வாழ்ந்த - அந்தச்
                                                                     சீர்மையான காலம்
                                                                     மீண்டும் வருமோ!

              ****


வருகைக்கு நன்றி தொடரும் பக்கங்கள் உங்களுக்காக