Sunday, August 14, 2011


மாறாத உண்மைகள்!

கடலும் - கண்மூடித்
தூங்கு வதில்லை;
காற்றும் - மௌனித்து
நிற்பதில்லை!

போற்றும் உடலும்
இறக்காமல் இருப்பதில்லை;
காக்கும் உயிரும்
பறக்காமல் வாழ்வதில்லை!


தேனும் மலரில்
நிலைப்பதில்லை;
தேடிய செல்வமும்
நிரந்தர மில்லை!

தேக சுகமும்
தொடர்ந்து வருவதில்லை;
தேவைகள் ஒரு போதும்
குறைந்து போவதுமில்லை!

நன்றி கொன்ற நாயை
கண்டதில்லை;
நன்றியுள்ளவரைக் -
காண்பதின்று சுலபமில்லை!

அகிம்சை வாழ - இங்கு
காந்தி மனமில்லை;
சனங்களின் மனங்களில்
சாந்தியைக் காணவில்லை!

உண்மையை உணர்ந்தவன் -
உலக - மாயையை நம்புவதில்லை;
தன்னையே உணராது
வாழ்பவர் மனிதரில்லை!














Sunday, August 7, 2011

எங்களைத் தெரியுமா?


பண்டைக் கால
பாரம்பரியங்கள்
இன்றுவரை....
இறந்து போகாமல்
காத்து வருகிறோம்;


நீதி வழுவா மன்னவர்,
நிழலும் புகழும்
செங்கோல் அறவும்
செழித்தே விளங்க
எங்கள் குலமும்
உழைத்தே வந்தது!


அரியணை மேலே,
அருகே...
அழகாய் நின்று
அரச பரம்பரையின்
அந்தஸ்தினையும்
உயர்த்தி நிறுத்தியவர்
எங்கள் இனத்தவரே!


வெண்மையாய் மட்டும்
வீற்றிருந்தோம் அன்று!
இன்றோ....


நிற வேறுபாடுகளும்
இனப்பாகு பாடுகளும்
எங்களிலும்
நிறையவே உண்டு!





ஆண் - பெண்
பால் வேறுபாடுகளும் - எங்களை
பல கூறுகள் போடுவதுண்டு!


பலரும்
பல் விழுந்தோரும் - எங்களை
இனங்கண்டு
பாதுகாப்பதுமுண்டு!


அரச குலம் -
மறைந்து போனதால்...
இறந்து போனது;
எங்கள் குலப் பெருமைகள்!


அதனால்....
நாய் பேய்களுக் கெல்லாம்
நாங்களின்று -
நல்ல - அடிமைகளானோம்!


நகரும் போது....
மண் பார்த்து நடந்தாலும்
தூங்கும் போது,
தலைகீழாய்
தொங்கியே ஆகுவோம்!


பொழியும் மழையும்
எங்கள் முதுகில்தான்;
சுட்டெரிக்கும்
சூரியனும்
பட்டுத் தெறிப்பது
எங்கள் மேனியல்தான்!


மரம் ஒன்றே யொன்று;
இலையும் ஒன்றேதான்;
என்றாலும்....
கிளைகளோ 
எட்டுத் திக்கும்
எட்டி நிற்கும்!'


விடுகதை யிது;
விடுவித்தால்....
விடை....
குடையென விரியும்!


                  














Tuesday, August 2, 2011

மேடு பள்ளம்!


அழுக்கேறிய -
கந்தலுடையில்...
கண்பார்வை குறைந்த
மந்த கதியில்
தட்டுத் தடுமாறும் உருவம்!


கையிலே....
ஊன்றுகோல்!
பையிலே....
பழைய பேப்பர்!
தொய்விலே....
தொடரும் துயரங்கள்!


உயர்சாதி வீட்டில்
ஒருகாலம் வாழ்ந்தவர்தான்!

நீந்தி விளையாட -
வீட்டுக் குள்ளேயே
வரவழைத்தவர்தான்!


நீடூழி வாழ -
சத்துணவுண்டு....
நோய்த் - தடுப்பூசிகளும்
போட்டதுண்டு!


நினைத்தபடி யெல்லாம்
வாழ்க்கைப் பாதையிலே
நடக்கப் பழகி....
விதிக்கு எதிராய்
விளையாடியதால்....
வழுக்கி விழுந்தவர்தான்!
வந்து கிடக்கிறார்;
வீதியோரம்!


வாங்கி வந்த இளமை;
வந்து சேர்ந்த பணம்;
வழியிலே....   
வடிந்து செல்ல......
உறவுகளும் -
உதிர்ந்து போக....


மனம் கசந்த -
மனித உருவத்துள்ளே
முதுமை முகாமிட்டு
நோய் நொடிகளை
குடியிருத்தியது!


கடைசியில்....
சாலையோரம் -
சவத்தைக் கிடத்திவிட்டு
எஞ்சியிருந்த உயிரும்
ஏமாற்றி விட்டது!


முகவரி கண்டு -
வாரிசுகள் ஓடோடி வந்து...
சங்கையாய்
அழைத்துச் சென்றார்;
சடலத்தை!


          ***





Wednesday, July 27, 2011


மனமே, மயக்கமென்ன?


                                                            கருவறையில்
                                                            இருள் மயக்கம்;
                                                            கனிந்து விழுந்ததால்
                                                            மண்ணில் -
                                                            மதி மயக்கம்!


                                                            உருவாகும் வயதில்
                                                            வருவ தெல்லாம் மயக்கம்
                                                            பருவங்கள் மாறி மாறி
                                                            தருவ தெல்லாம்
                                                            வித விதமான மயக்கம்!




                                                            கல்விப் பாதையில் -
                                                            கலையிலொரு மயக்கம்;
                                                            கற்றபின் கணக்கும் -
                                                            தலையிலொரு மயக்கம்!


                                                            வேலைதேடி அலைவதில்
                                                            விளைவ தொரு மயக்கம்;
                                                            மாலைசூடும் - மண நாளில்
                                                            மனதிலெழும்..... காம மயக்கம்!



                                                            வெற்றிகள் வந்து குவிகையில்
                                                            புத்தியிலொரு மயக்கம்;
                                                            வீழ்ச்சிகள் வந்து சேர்கையில்
                                                            மனச் சோர்வினில் ஒரு மயக்கம்!


                                                            கோழையாய் குனிந்தால் -
                                                            கொள்கை மயக்கம்;
                                                            ஏழையாய்ப் பிறந்தால்
                                                            எல்லாமே துன்ப மயக்கம்!




                                                            குற்ற உணர்வுகள் -
                                                            கொண்டுவருவது ஒரு மயக்கம்;
                                                            மற்றவரில் குற்றம் காண்பவர் -
                                                            மனதிலொரு மயக்கம்!


                                                            பொறாமைத் தீ எரிகையில்
                                                            நெஞ்சிலொரு மயக்கம்;
                                                            பொல்லாதார் அறிவினிலே
                                                            பொங்கிவரும் ஒரு மயக்கம்!


                                                             புன்னெறிகள் பூஜிக்கப் பட்டால்
                                                             நன்னெறிகளில் மயக்கம்;
                                                             வன்முறைகள் வரவேற்கப்பட்டால்
                                                             நன்மறை வழிகளில் மயக்கம்!


                                                             இறுமாப்பில் விளைவது
                                                             இணையிலா தொரு மயக்கம்;
                                                             இறப்பை மறந்த இதயத்தில்
                                                             என்றுமெ மயக்கம்!

                                                                                ***



Sunday, July 24, 2011


பள்ளம் பாயாத வெள்ளம்!

                                                            இரவு பகலாய் -
                                                            இரண்டு மூன்று நாளாய்
                                                            அடை மழை!


                                                             மடை உடைத்து
                                                             மதகு மேவி
                                                             பெருகியது;
                                                             பெரு வெள்ளம்!


                                                             வயல் வெளியும்
                                                             பச்சையாடை யைப் -
                                                             பறிகொடுத்து,
                                                             வெள்ளாடை உடுத்து
                                                             விதவையானது!


                                                             வீடு வளவு
                                                             வீதி - ஒழுங்கை
                                                             வெள்ளக் காடானது!
                                                             மடுமட்டை
                                                             குளம் குட்டை
                                                             பெருநீர்ப் பரப்பின் -
                                                             தனிக் கட்டுப் பாட்டில்!


                                                             பாடசாலைகள்
                                                             பள்ளிவாயல்கள்
                                                             தேவாலயம் - கோயில்கள்
                                                             இனவகுப் பெடுத்து
                                                             இடம் பெயர்ந்தோரின்
                                                             பூரண கட்டுப் பாட்டில்!


                                                             வந்த வெள்ளம்,
                                                             மந்த கதியில்
                                                             தந்த நிவாரணம்,
                                                             வெந்த உள்ளங்களின்
                                                             வேதனையைக் கூட்டியது!
                                                             சொட்டு அரிசியும்
                                                             தொட்டுக் குடிக்க
                                                             சீனி தேயிலையும் - பருப்போடு
                                                             கோதுமை மாவும்
                                                             மட்டுப் படுத்திய பங்கீடாய்
                                                             வந்து சேர்ந்தது;
                                                             கிராம் கணக்கில்!


                                                             வருகை தந்த
                                                            'டின் மீன்கள்'
                                                             வெள்ளத்தில் -
                                                             துள்ளிக் குதித்து
                                                             கள்ளப் பாழிகளில்
                                                             கவனமாய்
                                                             பதுங்கிக் கொண்டன!
                                                             பாதிக்கப் பட்டோரை
                                                             பாதிக் கண்ணாலும்
                                                             எட்டிப் பார்க்க -
                                                             மறுத்து விட்டன!


                                                             நிவாரணப் பட்டியலின்
                                                             நீளம் குறுகியதால்...
                                                             தட்டுப் பட்டுப் போனோரின்
                                                             தவிப்பிலே...
                                                             மன வேக்காட்டிலே...
                                                             வந்த வெள்ளம்!
                                                             வறண்டு பிளந்தது;
                                                             அந்த நிலம்!


                                                                          ***

             


Saturday, July 9, 2011

இனியும் வேண்டாம் 
    இந்தக் கொடுமை!

                                                            உலைப் பானையும்
                                                            ஊன்றி யிருக்கும்
                                                            மூன்று கற்களும்
                                                            செய்து கொண்ட ஒப்பந்தம்,
                                                            செயலிழந்து போய்....
                                                            மூன்று நாளாயிற்று!

                                                            அலைந்து திரிந்த -
                                                            கிழப்பூனை யொன்று
                                                            அடுப்படி முகாமிலே
                                                            முடங்கிக் கிடக்கிறது!


                                                             நாட்டின் -
                                                             வன்முறைக் கலாசாரத்தில்
                                                             தன் தாலியை -
                                                             பலிகொடுத்த
                                                             தாய்மை யின்று....


                                            
                                                             கூட்டுக் குள்ளே
                                                             குறுகிப் போய்
                                                             வீட்டுக் குள்ளே -
                                                             குந்தியழுகிறது!


                                                             வற்றிய வயிற்றின்
                                                             சுரப்பிகளின் -
                                                             கிளர்ச்சியினால்
                                                             பற்றியெரியும் பசிக்கு....


                                                             பாலாபிஷேகம் கோரி
                                                             பச்சிளம் மனசு,
                                                             குச்சிக் குடிசையுள்ளே
                                                             அழுகைப் புரட்சி செய்கிறது!


                                                             மச்சு வீட்டில்
                                                             பிறக்காதது,
                                                             மழலை செய்த குற்றமோ?


                                                             வந்தவர்க் கெல்லாம்
                                                             முந்தானை விரிக்க -
                                                             நினைக்காமல்....
                                                             ஒழுக்க வேலிக் குள்ளே
                                                             ஒடுங்கிக் கொண்டது
                                                             விதவை செய்த குற்றமா.......?


                                                                           *** 



Sunday, June 12, 2011


பல முகங்கள்!


                                             மனிதன்
                                                             மரண தண்டனை 
                                                             விதிக்கப்பட்ட
                                                             ஆயுள்கால கைதி!


                                               காலம்
                                                             மானிடரால்
                                                             மாசுபடுத்தப்பட்டு,
                                                             மறைமுகமாய்
                                                             நின்றழுது.....
                                                             கரைந்துருகும்
                                                             மெழுகுதிரி!

                                            மனிதம்
                                                             மனித மனதி லிருந்து
                                                             இடம்பெயர்ந்த
                                                             அகதி!


                                         கணவன்
                                                             குடும்பக் கோட்டையுள்ளே
                                                             தலைமைப் பதவியை
                                                             தக்கவைத்துக் கொள்ள
                                                             நித்தமும் போராடும்
                                                             தியாகி!


                                         மனைவி
                                                             ஆளும் வர்க்கமாம்
                                                             ஆணினத்தின் பலமான
                                                             எதிர்கட்சித் தலைவி!

                                        மாணவர்
                                                             பாடம் புரிகிறதோ....
                                                             இல்லையோ.....?
                                                             பள்ளிக்கு... 
                                                             வருகை தரும்
                                                             வெள்ளை -
                                                             வண்ணத்துப் பூச்சிகள்!




                                      ஆசிரியன்
                                                             வெள்ள நிவாரணம்
                                                             வேண்டாம்;
                                                             வறட்சி நிவாரண மாவது
                                                             வந்து சேராதோ.....?
                                                             என்றே... வாடி நிற்கும் -
                                                             அரச அநாதை!


                                       பெற்றவர்
                                                             பெற்ற கடனுக்கு -
                                                             பிள்ளை....
                                                             கல்வி கற்றிட
                                                             பள்ளி எனும்
                                                             சிறையிலே...
                                                             தள்ளி விடும் -
                                                             ஜெயிலர்கள்! 


                                          கற்றவர்
                                                             சமூகத்தில் -
                                                             நடப்பது நடக்கட்டும்
                                                            'நமக்கேன் வீண் வம்பு'
                                                             என்று....
                                                             விலகி நின்று -
                                                             வேடிக்கை பார்க்கும்
                                                             நவயுக சுயநல வாதிகள்!

                                      தனவந்தர்
                                                            'எல்லாம் எனக்குத்தான்
                                                             இறைவன் கொடுத்தான்!'
                                                             என்ற - வாதத்தால்...
                                                             இதயம்...
                                                             முடமாகிப் போன
                                                             தன - வேந்தர்கள்!


                                பொது மக்கள்
                                                             இவர்கள் -
                                                             எதற்குப் பொதுவானவர்கள்?
                                                             எனக்கப் புரியவில்லை!


                                                             சமூதாய வில்லர்களுக்கு
                                                             சரியான மதிப்பளிக்கும்
                                                             சன - நாயக மன்னர்கள்!


                                                                        ****








Saturday, June 11, 2011


வாழ்க்கை புதிர்!

                                                           வாழ்க்கை ஒரு 
                                                           சவாலானால்.... 
                                                           சாதிக்கலாம்!
                                                           போராட்டமானால்
                                                           வென்று காட்டலாம்!


                                                           விளையாட்டானால்
                                                           களமிறங்கலாம்;
                                                           விடுகதையானால்....
                                                           விடுவிக்கலாம்!


                                                           வெகுமதியானால்....
                                                           வரவேற்கலாம்;
                                                           சுமையானால்....
                                                           தாங்கிக் கொள்ளலாம்!




                                                           சந்தர்ப்பமானால்....
                                                           பற்றிப் பிடிக்கலாம்;
                                                           சாக்கடையானால்.....
                                                           பூக்கடையாக்கலாம்!


                                                           வினாக் குறியானால்
                                                           விடை காணலாம்;
                                                           வியப்புக் குறியானால்......?


                                                           சிறைக் கூடமானால்
                                                           அடங்கிக் கிடக்கலாம்;
                                                           மரண வேதனையானால்......?


                                                           தென்றலானால்....
                                                           சுகங் காணலாம்;
                                                           சூறாவளியானால்......?


                                                                      ****